رجل...و امرأة...

رجل تكرهه كل النساء

البخيل

جلست إلى جواره تفكر كثيراً , تعلم ما ينتظرها من وابل وإعصار فور نطقها لحلم يراودها منذ أيام
أخيراً لملمت شتات كلماتها الهاربة ثم تشجعت وبدأت الحوار
الزوجة :- سي محمود .... يا سي محمود .... ونبي ترد عليا يا اخويا
سيب الجرنال الـ فإيدك ده ورد عليا
الزوج :- خير يا رب
الزوجة :- خير .. والله خير يا اخويا .. يجعل الخير طريقك وسكتك يا محمود يا بن حوا وادم ويــــ ....
الزوج :- خلصي في إيه
الزوجة :- الشبشب
الزوج :- إشمعنى
الزوجه :- الشبشب الي كنت شاريهولي من تلت سنين داب ومعتش ينفع يتصلح و...
الزوج :- مش النعل لسه بخيرة نركبله وش عند سعيد الجزمجي ولو انه مغلواني وحرامي
الزوجة :- لو في أمل من النعل كنت ركبت وش زي كل مرة لكن المشكلة النعل داب
الزوج :- خلاص مش شبشب بنتك الي انا شاريه السنه الـ فاتت بخيره
الزوجة : أيوه ربنا يخليك لينا مش حارمنا من حاجه
الزوج : - خلاص وقت تكون هي في البيت إنزلي قضي طلباتك بيه
الزوجه :- بس يا ....
الزوج : إنتي لسه هتبسبسي سيبك من الكلام الفارغ ده وخدي مفتاح الدولاب أهو
هاتي نص كيس السكر أديلك منه نص معلقة وإعمليلي كوباية شاى من التفل
بتاع إمبارح .... يلا إنتى لسه هتبصيلي .... عكرتي مزاجي


مضت الزوجة إلى صندوق الخزانة وألف لعنة في صدرها تعلن الكره لهذا الزوج البخيل .

***************************
امرأه يكرهها كل الرجال


الثرثارة


عاد إلى منزله بعد يوم حافل بالمشاق طامعاً في قسط من الراحة, تلك الراحة التي يعلم علم اليقين أنها حلم بعيد المنال ,ألقى بجسده على فراشه بينما اقتربت هي وبدأت في ممارسة هوايتها

الزوجة : شفت يا حووووده طلع زي مقلتلك بالظبط
الزوج : نفس عميق .. هو إيه اللي طلع
الزوجة :- البت سامية جارتنا إنت نسيت ولا إييييه
زي مقلتلك إمبارح أنا تخميناتي متنزلش الأرض أبداً
أنا سألت وإطقست وعرفت ان جوزها طلقها .... آه بمناسبة الطلاق المأذون اللي ساكن فوقينا غُـلب ياخويا يخبط علينا النهارده ....كل شوية يسأل عليك .. إلا كان بيسأل عليك ليه؟؟.. إوعي يكون عليك حاجه ليه .. آه أنا مرضاش يكون جوزي مديون..
أنا أحرم نفسي من ال عوزاه ومتدينشي لحد أبداً
آه وبالمناسبة كنت عاوزه حتتين قماش حرير اصلي م اللي البت نرجس بتسافر تجيبهم من بورسعيد...على فكرة بيقولوا بوسعيد دي تجنن عايزين نبقي نزورها في الصيف ... أصل الصيف بشايره السنة دي بتقول هيكون حر أوي ولازم بصراحة كده نشتري تكيف ..آه أمال .. نشتريه من المحل اللي علي ناصية الشارع . ده عنده شوية أجهزة كهربائية تاخد العقل تهبل كده تهبل

أيوة صحيح الواد الأهبل اللي داير يمشي في الشارع يحدف بالطوب كان هيكسرلنا الازاز النهارده
أجيبلك إزازة حاجه ساقعه تشربها يا اخويا ؟؟
الزوج :- خخخخخخخخخخخخخخ
الزوجة : إنت نمت يا أخويا ... طيب نوم العافية .. عايزاك تنام وتقوم فايق بالليل ..أصل في فيلم هيجي النهارده في السهرة ... ياه يا محمود إعلاناته مرعبة .. يااه كمان علي البطلة فاكر الفيلم الاخير بتاعها لما .................................................. .................................................. .................................................. .................................................. .................................................. ....... يووه
أنا هقوم أقعد مع الست زينات جارتنا تعبت من كتر ما بكلمك وإنت نايم كده ومبتردش

خرجت وأغلقت الباب خلفها فتنهد الزوج وسحب غطاءه فوق رأسه وتعالى صوت لعناته على زوجته الثرثارة فإذا بها تسمعه فتفتح الباب من جديد
الزوجة : إنت بتنادي يا حبيبي
الزوج : خخخخخخخخخخخخخخخخخخخخخخخخخخخخخخخخخخخ